Nai-ngai Pathian manjet na

Nule Pa Pathian jet hanko Pathian nai kani tirakip ning Christa tenna ranak kanneijak niluia kannaingai sannarang chingna Christa jiang kannei ani.

Nai yok hi aching ngaining kut a Sabon chop kanlek le akang ang anti. Adikkhan namet le aterpot hale yamma asirra na o le achuldoi ani. Hajarhan asat a nalek maknukko neimanjotlui ani. Nulepa daito lian takko kannai ngai Pathian manjetrang hi kanchoun ani. Arappa tak ankhat om aluttakko Nai-ngai rang Pathian jiang lamperat niluia adang kantor ommak. Lamna hi kanrat rang,kanbangluirang ani. Judges 13:8-9 hinding Monoah antipaning anai alachanglui/ alaneilui Samson ranga lamna anei. Inneithar ngain anlaneilui nai-rang adikhan lamrang hi asouk. Lamentations 2:19 han jaanna thui in nanai-ngairang kheknang lamro ati.

Mi khat ning hingahin ati “naingai ringkhohi khup wa aom”. Tinako kankhup-kan-billing a Pathian jiang kanlam rang hi kannai ngairang aluttak ani.

Hanko ho ang lamna mo kannai ngairang kanlamrang? Mi atamlam ning kannai-ngai Damtheinarang, pong khodengthei anneimak narang, lairik antheinarang, Chongjui anchang narang, mile ankansoulmak narang, hanko adang adang kanlampe ani. Tak anoi a lampenarang chonglam alek hi ngaidonderei /enderei. Aluttak a Nulepa keini ning kannai ngairang kan-i-lam rang ani.

1: kannai ning Puma Jesu Christa hi anasanringpu ke tia ajet le kanroia aringkho akanpek narang lamperei. 1st John 5:11-12.
2: kannai ning Christa nukjui achangle kanroia athona rakip a Christa chitjak nei mi achang narang kanlamperang ani. colossian 1: 9-10.
3: kannai ning nulepa chitjak hale chongjui achangnarang kanlamperang ani. proverbs 1:8.
4: kannai ning Sapsat(pathian jet)amu narang hale Pathian lungdowa saplejaar ngaile kantop na aneitornarang lamperang ani. 2 corinthians 6:14-15.
5: kannai ning adik lamjak ajui narang lamperei. Hale leisei hi amatiir/ ada narang ajarko leisei ‘Pa’ ko Seitan ani. john 8:44
6: kannai ning ankhat ko nulepa chang keinining kutchoi Pathian ning ipek ha jet le kanroia Pathian rengram liannaranga neimanthei achang narang lamperang. Ephesian 4:7
7: kannai ning athianga aring narang , omchan salui, chak salui, tho salui rakip wa athianga aomtor narang kanlamperang ani. proverbs 20:11
8: kannai ning Pathian lungdo tok a inlelui pal tiang anitornarang lamrang ani.psalm 127:1
9: kannai inlelui apal karra athianga aomma kansen omluia ahip adai tak a anpal narang lamperang ani. Malachi 2:16 han ati ” kein kansen kamatiir”.
10: kannai ning chung soukna angaidonna athona irakip a chungsouk tornarang lamperei. proverbs 1:5
11: kannai taksha damtak a aomnarang lamperei. Isaiah 53:5
12: kannai asalui ankhat om thina mangna tenna Pathian ning asannarang lamperei. paslm 91:11-12
13: kannai jiang asalui insung ning kanluisiak ngai achunga achulmak narang lamperei. Insung natna, mi-ngaidam torlui, mankanlianna, Doi le ai, insung nunchan salui rakip Christa thisen han arasuk pet a hiwa ngai rakip Nai jiang alut mak narang kanlamrang ani. 2 corinthians 5:17, Gal 5:1

(to be continued)