Homiletics in Aimol | Rev. L. Heli Aimol, Pastor, Aimol Worship Service Delhi
“Biak-Inna Pathian Chubei Kanbuk Kârra, Chuanlam Rakip Lamkaipu Ning Ijamo Adik ah Chong Ajehkrang, Hale Ijamo Lamkaina Aneirang Tiha Jettheiranga Lekhabu ha ani.”
CHONGLAMSÂT
Hiva Homiletics lekhabu tehi hongsin torna kanei jarra Pathian kamanpâk. Hiva lâirik hi keini Biakrup suhnga anile adadang munna Pathian chubei bukna kannei kârra, worship leader ngâining anile alutihr ngâining ijamo lamkaina anneirang tia jetthei naranga ani. Hiva ruia hiva lâirik hi nang ranga ko atharko luinimak ajowt, aninom ke chuanna kanhongtho kârra ko, hiva Homiletics chena dân nukjuia kanjuitorluina atam aom ani.
Hiva Homiletics lâirik hinko Pathian chonghi ijamo kanrirang, ijamo sermon kansinrang hale Preacher khat ning ijamo Pathian chong arirang asuak titianga ko nimak. Hiva lâiriklam hiko Biak-Inna Pathian chubei kanbuk kârra, lamkaipu (leader) ning ijamo lamkaina aneirang, mitam kârra ijamo chong ajehkrang ti tianga kanchunaranga ani. Ajârko, Homiletics chonghi atamlam ningko Pathian Chong rirang tiangjak ani tia anjet, tâk-ha, hiva hi worship leader (lamkai) ngâirang om ani.
Hiva lâiriklam hiko Biak-Inna Pathian chubei kanbuk kârra, lamkaipu (leader) ning ijamo lamkaina aneirang, mitam kârra ijamo chong ajehkrang ti tianga kanchunaranga ani.
Hiva hi alutihr (leader) khat nachanga mitam kârra chong najehk kârra ijamo nari rang, ijamo lamkaina naneirang tia jetnaranga ani. Mitam lamning ko luijet om ajowt aninom alajetlui ngâiranga alekte neimankâina achangrang mo tia kihongsin ani. Ajârko, irakip hi kanjetver ko apua, tâk-ha, chuanna kanhongtho kârra ko ahong vâtsam na atam aom chachak ani.
Hajarra, hiva ruia alekte kahongsin hi nangin lungsiat tak ah ado downna telsuak ro, hale nahong telsuak kârra, nangranga anemnarang aluini aninko Pathian manpâk le kanruaia Ama alurhna aliannaranga worship lamkaipu atheitak miha hongchongro. Nangin lamkaipu khat nahong changhan, nang jarra Biakrup suhnga, na Association suhnga hale ho honna aninom, worship lamkaipu atheitak, hale mirakip ha Pathian manchit manjakna nei, hale Pathian ha domsângna aneitor biakrup ha hangman changro tia Jisu Khrista minga risuakna kanei ani. Hiva suale veikhat ijamo sermon kansinrang, ijamo Pathian Chong kanrirang, hale sermon rirang hi amakhal ijet mo a om, hale sermon sinranga, Preaching thorang i-imo angâi tia adangkhat lâirik han veikhat kanchonga kanchuna neireht kanti.
Pathian ning nahong telsuakrang chunga ravânsat phual napehk rase Amen!
DELIVERY OF THE SERMON:
Pathian chongrih narangle ngâiranga aphât ha ahong tung kârra, worship leader ning mitam ngâiha asat ah ongnaranga anile ahip adâia Pathian chongha manngâi naranga asinrang asuak. Pathian chongrihpu ha midang khat aninko ama ruia alekte mitam madownna risuakrang hi angâi. Kanmasia mi aninko ngâimak. Mehl dona anile Chongripu (Preacher) ama ruia najehk kârra aseia rimaro. Preacher hi kanchong kanla ajetlui mi aninko kanchonga male ranga (interpreter) hi angâi ani. Kanchonga male rang chuanhi beichekmak hajarra, hiva chuantianga ajet athei mingâiha ngehnnale kanruaia kanman thorang asuak.
SINGING OF THE LAST HYMN:
Atorna hymn, la hi machilâi Preacher ning Pathian Chong aluiri hale arui akanjom laha aom aninko thorang angâi. Hale mitam ning anthei anjet, anile ahui la ham thangrang angâi. Mirakip ning thuinanta Pathian manpâkna lahi ansiar chunrang asuak.
THE BENEDICTION:
Benediction hiko atorna tak ah, Pathian phual lamha ani. Hiva hi Baibol suhnga
akan iha aninom, animak nom Preacher ning animale adangkhat ning arisuak ah alamha ani. Hiva hiko lamjehl ke kehngha nimak, hale hivahi mitam ning lamna anneichunrang suakmak tâk-ha, hiva hi ko abongkak ah ahuinianga lamna ha ani. Hiva kantile akhehlla jowtmak tina changmak, hiva hi crusade tâng anile camps tâng hale adang utt alianna service thona hanko mi ngâiha pulpit tiang kuina anneia lamna anneipe ham ani. Hiva lamna naneisuale omke mitamning ankan nolla lamdena annei om aom ani.
THE POSTLUDE:
Pathian chongripu ning anile Pastor khatning atorna phual lamna ha atorlen le,
mitam ning anthuia tualtiang ansuak lâitak han, Biakrup Choir ngâining anile music kandâi ngâining Piano mo Guitar hanmo ajâmma, arasa dâinianga anhong manrâm anile la anhong tho ha Postlude music anti ani. Hiva hi kan thorang asuak.
SCRIPTURE READING:
Hiva Baibol akuhng alam ngâihi atam tak aluttak ani. Ajârko, Pathian chongha hava nukjuia rirang asuak ani. Hiva hi Puma Jisu Khrista achongsat ha risuakna, telsuakna, phuangsuakna pha ani. Nangin Baibol akuhng alam nahongpa karra miring alehkning Pathian jiang anhong kanpehksowt om an om ani. Hajarra hiva hi asat ah manrit ah, anile chitle jak tak ah kanthorang asuak. Pathian maikuhnga kan ong ani.
Nahongpa rang Baibol akuhng alam ngâiha Preacher ning ahongri rangle arui akanjomrang asuak. Imo natelsuakrang ha nangin asat ah athianghiaija najetrang asuak. Biakrup mipui ningom asat ah omchianna anngâirang asuak. Hiva hi aparang/atelsuakrang miha leader ning asat ah aripe rang asuak ani. Hale ahong telsuak rangpa/rangnu nanginom ke Baibol paranga annabe aninko asat ah akuhng alam ngâiha enro, hale paro, hale naparang aramal ngâiham aratha jetna thoro. Nalungsuhng tenna manrit irnang natelsuak rang asuak ajârko, Pathian Chongko Ringna Bulom ani. Napa kârra aramal manthiang hiairo, arak ah kannot ah telmaro, hale nut om nutrei maro.
INTERCESSORY PRAYER:
Hiva hi ankhat le ankhat ranga kanlampe naha ani. Kanram kantuiranga, kankhua ranga, kanjât ranga lamna ha ani. Hiva hiko natakranga na insuhng ranga nalamrang suakmak. Midang ngâiranga ani. Hiva hi mitam ning kanlam chunnom ajowt. Aninom ke, hiva Intercessory prayer hiko Biakrup tianga alutihr/elders ngâining anile Pathian chuantho ngâining anlam ninko akhehlla asat. Lamna anneima prayer points rakip ha mân jetrang angâi.
(INTERCESSORY PRAYER): Hiva hiko natakranga na insuhng ranga nalamrang suakmak. Midang ngâiranga ani.
PULPIT HYMN:
Pulpit hymn hi Preacher ning aphât aluitiang han mitam ning la abongte khat antho ha ani. Hiva hi music jak: Piano mo anile guitar ha ankandâi nom ajowt. Hale hiva pulpit hymn hi mitamning anngihr bak a antho ning ko akhehlla asat ani. La antho sualen le leader ning mitamha man ongnati hale preacher ha pulpit han kuina neinati. Animale pulpit hymn la ha anthoma han leader ning aluikuinom ajowt.
Biak-Inn a Pathian Chubei kanbuk kârra Ijamo lamkaina kannei rang tiha akhehlla jetna ranga hiva athuai ja kahong i- ngâihi abeichek ah jetnaranga order of service (Chuanlam) ha ani:
• Prelude
• Call to worship with Invocation Prayer
• Congregational singing of hymn/Praise and Worship
• Responsive Reading
• Prayer
• Announcement
• Special Music
• Offertory Hymn
• Collection of Offering and its Dediccation
• Scripture Reading
• Intercessory Prayer
• Pulpit Hymn
• Gospel Message-Preacher
• Last hymn
• Doxology
• Benediction
• Postlude
PRELUDE:
Hiva tina ko Pathian chubei bukranga chuanlam kanphut ma han piano mo, guitar mo anile Biakrup Choir ngâi ningmo arasa ahipjinna mipui jiang Pathian manpâkna la abongkak ah anhongtho ha ani. Hiva hi kanthorang asuak ajârko, mirakip ning Biak-Inna anhongluht kârra omchian a anlung suhnga Pathian mâikuhnga kan om ani tiha an ngâidonrang asuak. Hiva jarra tuning omke kannok hehl hohlrang suakmak. Music ha ahip adâia hale kanhe dâinianga Pathian ha kanmanpâk aninko ahongluht mirakip lungsuhnga Pathian ha oitorna anneirang ani. Hiva phât tak hin mirakip ning athianga, manrit a, omchian a Pathian ha chitle jak neina apha ani. Hiva music anile labong tehi atorlenle Pathian jiang lamna anneirang asuak. Hale Pathian ko asat ani, Halleluah Praise the Lord tia mitam ha mathokna neirangom angâi ani. Hiva chongsat chonghui ngâihi Biak-Inna ahongluht rakip ha anlung manhuina, nuisiam parsiam ma Pathian mâikuhnga kan om ani tia huina ningsatna hi ahongchoi ani.
Lamkaipu ning athorang ankhat omke a ijehk rang suak chonglam ngâi:
Hiva hi alianna jetrang asuak ankhat ko Thavâng tianga (Spiritual effectiveness) chungsuakna anile chungsuakmakna aliantak ko hava lamkaipu Akut chunga a om verjui. Worship lamkaipu haning atheiniluirang ankhat ko, service suhnga lam akai phât han amaning O.T. lâia thiampu chuanha athoke tiha ajetrang asuak. Mirakip ha aring Pathian mâikuhnga lam akai ani tihi atheiniluirang anido. Keinining hiva ngâihi aphât rakip ah ‘Conductor’, ‘Moderator’ hale Compere tia kanneiman tâk-ha, hiva ngâihi worship leader leko kan angmak. Leader ti chonghi achampak ani. Tâk-ha, hiva hi amunle aphât rakip ah kanneiman. Hajarra, worship lamkaipu ankhat ning Pathian maikuhnga mitam lamkaina aneihi aliantak, aluttak chuan ani tiha ajetrang asuakjui.
Pathian Chubei bukna niluia secular ah adang dang committee kanchunna va lamkaipu hale keini Khristian ngâi Pathian Chubei bukna va lamkaipu changhi atam akankhehl ani. Hava committee kanchunna hanko lamkaipu ning angihrra kanrehnga kankip jui mo? Kan meeting hi phuttarei tia hongrithei ani. Hiva hi adik ani ajârko, anmani ning ankhat le khat anlui kanngâk ah mikip ranga anluikan en ani. Hajarra kanchuan, kan meeting phuttarei anhong tirang asuak.
Pathian Chubei bukna niluia secular ah adang dang committee kanchunna va lamkaipu hale keini Khristian ngâi Pathian Chubei bukna va lamkaipu changhi atam akankhehl ani.
Tâk-ha, keini Khristian Biak-Inna ko Chubei bukna pha ahongjui, chubeibuk ranga mingâining Biak inna ado downna, ankha khat, anile insuhng inshung mingâining anhongluht ah antak antak ning an ongna han an onglenle Pathian jiang anlam ani. Hiva hi athianga ko hava han Pathian chubei buk hi niphutjui ke. Hajarra han Pathian chubeibuk hi phuttarei tirang hi akanhuilui khat aom. Hajarra, athuaia hin enro.
LAMKAIPU NING AJETRANG SUAK ALUTTAK CHUAN ALEK ENREI:
1. Lungsiat tak ah “Pathian chubei buk hi phuttarei/kanphât hi phuttarei ajârko, kanchuan phutnarang aphât ha ahongtungjui tia” richilmaro. Ajârko, worship thoranga ko mitam ning Biak-inn suhnga aluihongluht suajui. Worship ko aluiphut suajui ani. Ha ngan tirang rahut ah kanchuan lamhi ado downna chetarei nu tiro. (Ajârko, nangin bukhehng khat nanehk suale veikhat bu nehktarei nu, anile bunehk nanrang lamna neitarei nu tia tichil no nache ta? Ajârko, Buko khehngkhat ko naluitorjui ta, ha anghan Prelude sualen le Lamna mân kannei rang asuak)
2. Lungsiat tak ah, Hymn no 100 ha thorei timaro” ajârko, hymn no 100 ha kantho rang nimak, hymn ha kanthorang ani hako “Lungsiat chonghi ahui chungnung”. Hiva hi aka kârra kanchong jehk grammatical ah adiklui jarra ani.
ANNOUNCEMENT:
Biak inn suhnga Pathian Chubei bukna phât ah ko chongphuang rang rakip hi Biakrup tianga arui akanjomrang asuak. Chong phuangna hi lungtel lunghângna, miran mikowk naranga anirang suakmak. Worship suhnga Politics ruia chonghi phuangrang suak chilmak. Hiva phât hiko Pathian le mirakip ning omchianna thavânga chubei buksuamna phaha ani. Hale Church ruia chongphuangna nanei rang aninom ke abongkak ah athianghiaia, nolchilluia naphuang rang asuak. Hiva chongphuangna phât hin leader ning anile Pastor ning mithar ahong ngâiha anile VIPs ngâiha mehldo na ham neithei ani.
SPECIAL NUMBER/MUSIC:
Special Number kanti karra: skit, Baibol telsuakna anile adang dang ngâiha ani. Tâk-ha, Special Music kanti ningko, hiva hi lasiar tiangle arui akanjomjui ani. Hajarra, hiva hi Special Music tia kantirang asuak. Hiva Pathian chubei bukna hin Rochi rirangpu le Pathian Chongha domsângna anei ani. Special la siarrang ngâi nomke La siarrang nati karra nala siarrang amingjak ha riro hava khehl la ko adang jehkde lâi maro. Nala siarrang rakip ha nangin rimanthâi delâi maro, hale male om male maro, ajârko, hava ha ngâimak.
SPECIAL MUSIC/ SPECIAL NUMBER RANGA NAKUI KARRA:
Hiva worship service suhnga lamkai puning asat ah kerep ah chongphuangna anile kuina aneirang asuak. Hiva hi ijamo la siar ranga nangin nakuisuak rang ti chongngâihi adadang chong ramal atam a om, aninom hiva athuaia ka i chong ngâihin kanchurang alek aom:
a. Atuhn ko numei rup ngâitenna special music ha ngâina neitarei.
b. Atuhn ko Khangdowng ngâining Pathian Chongsat ha la han nahong choipe nanti.
c. Atuhn ko Pathian chonghui hi nâipang ngâining la han nahongsiar perang an ni.
OFFERTORY HYMN, COLLECTION OF OFFERING AND ITS DEDICATION:
Offertory hymn anile special music ngâihi pehkna le arui akanjomrang asuak, hale offering ngâiha hiva phât suhnga anchowmrang ani. Hiva offering pehklut naranga lamna aninom hale doxology aninom la han tho ajowt. Hiva offering anchowm suhnga tithes achanga kutchoi achanga thanksgiving achanga adang dang ranga pehkthei ani. Adang Biakrup herphet ko hiva phât hin nâite ngâiha Pathian jiang pehklut na annei ani. Tâk-ha, Biakrup herphet ningko nâite ngâi dedication hi atheia thona annei. Hale Biakrup aviar ningko Sermon anpehk madown han nom antho ani.
Nangin Baibol telsuak ranga Pulpit ah nangihr kârra, na itelsuakrang Baibol akuhng alam ngâiha asat ah risuak ro. Hinga hin nati nom ajowt.
i. Ve-enni jihngtiang/nitak/ suhn na ka itelsuakrang Baibol akuhnghi hiva tenna ani (kaluithuak ani tihi adiklui ani):
• Joshua akuhng ankhat, alam ankhat tenna kua (Joshua 1:1-9)
• Paul ning Timothi jiang a i lâirik/Rabu ankhatchangna Timothi akuhng ankhat alam ankhat tenna rangnga (5) (1Timothi 1:1-5)
• Mathiu Gospel nukjuia akuhng ranga, alam anthum tenna sowm (Mathiu 5:3-10) Kei’n kihong telsuak rang Baibol hi NIV, NKJV or KJV tenna ani tia narisuak rang angâi.
ii. Atuhn jihngtiang/nitâk/suhnna Pathian chong telsuak ranghi Luk 15:1- 10 han kanmu. Kahong telsuakrang Baibol ko NIV, KJV, RSV, NRSV
tenna ani tiro.
Pathian Chongha natelsua le, hinga hin tiro:
• Puma ning Ama achongthiang ahongtelsuak anile ahong ngâi mirakip
• chunga Phual napehk rase.
• Pathian ning Achongha kantelsuak le kanruaia phual napehk rase.
• Hiva hi Pathian Chong ani.
• Pathian Chong katelsuaknaha hin atorjui Amen!
CONGREGATIONAL SINGING:
Hiva hi Pathian manpâkna la, (Praise and Worship) mitam ning la thochun anile Biakrup choir ngâining la antho ngâiha ani. Choir aom makna hanko mipuining laha anthochun rang asuak. Hiva ranga la siarrang ngâi hako Biakrup la han Pathian manpâkna la. Pathian luhrna lianna la, Pathian chubei bukna la, Pathian Choilowmna la hale adang dang hymn ah akanchellui contemporary worship songs ngâi om tho ajowt.
RESPONSIVE READING:
Hiva hi chonglam khat suhnga ankan sanga Pathian Chongha antelsuak chun ha ani. Hiva ranga nangin nadei Baibol akuhng le alam ngâiha risuak nata mipuijiang asat a namanjet rang ani. OT tiang aninom NT tiang aninom ke lamkaipu nangin lamkaina nanei rang asuak. Hako Psalm 23 mo 1 Korinthians
13 mo anile Mathiu 5:3-11 ngâimo nadei Baibol akuhng alam ngâiha nangin thangsuak ro. Hava han nangin aphut na tak alamha napa rang anile mipui ning annichangna alam han annahong sangrang hiva hi responsive reading anti ani. Hiva hi atorlen le Pathian jiang abongkak ah lamna neirang asuak.
3. Lungsiat tak ah order of service (Chuanlam) ha mirakip jiang ansem aninko nangin veikhat pareht/telsuakreht lâi maro. Ajârko, nangin nahong telsuak rehtrang ha anemnabui anijui. Tâk-ha, hava order of service (Chuanlam) suhnghan mi ming luithuakrang anile hapderang alui om aninko nangin natelsuak nom ajowt.
4. Lungsiat tak ah, “Atuhnko Pathian chong ngâiranga aluttak aphaha anijui” tia timarei. Hava rahut ah atuhnko kanlunga Pathian chongsat chonghui hi luiluht naranga kansiam tarei, animale atuhn ko kanlunghi Pathian chonghan kanvâina neitarei tia rithei ani.
5. Lungsiat tak ah Pulpit han chiam rimaro; ajârko, hava han mitam jiang
Pathian chubei buk hi chitle jak neitorma uh.
6. Lungsiat tak ah service order suhnga akanchellui mingâi ha veikhat lasiar ranga anile chongphuang ranga kuidelâi maro. Hale Chongphuangna rakip ha Church/Biakrup tiang le arui akanjomrang asuak.
7. Lungsiat tak ah, Preacher ning aluijehksa ngâiha veikhat nangin noldereht lâimaro. Hava rahut ah “Pathian chong ahuitak nana manchu jârra kanna manpâk. Ratha tianga kansownna damnaranga ratha bu han nana vâi jârra Pathian ning phual naperase tia narirang ani. Tâk-ha, alui jehksa Pathian chongngâiha nangin veikhat rimanthâi reht lâi maro.
8. Lungsiat tak ah mi mehl dona phât han na idorang miring ngâiha anmingtak le anchuantho na ngâiha asat ah jetbak nang mehldona neiro. Lungsiat tak ah nangihr peru, kankârra nanna kanchelpui jarra kanna manpâk. Pathian ning phual naperase tinang lulian bânlianna Jisu minga donna (Welcome) neiro.
9. Lungsiat tak a kan program hi timaro, hava rahut a kan service hi phutna
neitarei tiro. Ajârko, Program kantining ko cultural program mo nati adang dang ramual chungtianga program ngâiha ani, tâk-ha, service kantining ko keini Biakrup tianga Pathian manpâkna le arui akanjowm rakip hi service tia kantirang asuak.
10. Lungsiat tak ah hiva athuaia akan i ngâihi nangin kanbetâina nunchan ha neimaro:
• “Kei kachuan atam aluichil jârra asat ah Pathian Chonghi jehktor lâi making, aninom ke hangan ankhat anijak aninom kei’n hongri kati tia jehk chilmaro. Ajârko, nangin hava chuan thoranga naluijowt ah, oh kei rikati anile oh kei lamkaipu changkati tia naluijowtsa ke. Nang nachuan ko Pathian Chong riranga ani, hava jârra natak in lamna le kanruaia nakansiam rang asuak, hale Pathian ning anamanjetna le nangin nakanchuna nukjuihan ningsat tak ah nari rang asuakjui. Lungthiang tak ah riro, thouna sat tak ah ngihrro jehkro, lamkaina neiro. Pathian ning nangha naruai nati.
• Keiko lasiar om theimaking. Karohl hi om ajowtlui, ahuilui atorna ke. tâk-ha, hongtho ke kehng rong tia tichilmaro.Hiva hi atam adiklui ani.
Ajârko, Pathian jianga la kansiar karra, phur anni asuak hako:
• Nala siarha ahuinom ahuimak nom, Mitam ha anlunga huina ningsat na annei. Ajârko, Pathian ranga la nasiar ke, mitam ranga changmak.
• Annichangna, Pathian lungsiatna ha akando; Amingthiang ha lianna seina hale kan idomsâng ani.
• Lahi asat ah hongkanchu lâimaksing hajarra kanla hi machibuia an kanchâk anga ni ajowt tia rimaro.
Nangin laha asat ah naluikanchu mak aninom ke alekte najet han Thavânga tho innang Pathian ha nala siarhan ningsat ningsat ah manpâk roh.
• Kan Pastor hi ataksa adam mak jarra, ama rahut kei’n Pathian Chong kari rang ani. Ama anga kanimak nom lungsiat tak ah na ngâidamru tia richilmaro.
Ajârko, mirakip ning nangha Pastor rahut nathuhlla chong narirangke tiha anjet. Hajarra, Pastor anga thorang thomaro, anile ama nehk am khehlrang thomaro. Hava rahut ah nathorang suak ha nangin takngâi tak ah thochianro. Pathian ning kantormak na kanvâtsamna irakip anajet ani.
• Keihi Biakrup aluteer ranga anathangjui ke. Tâk-ha, katak ngâina ko ium ommak. Hajarra kei asat chuan hongtho torno ning tia rimaro. Hiva hi adiklui ani.
Jisu atihrlon ngâi om kan angver mak uh. Alek ning atam anthei, alek ning theirem mak u. Tâk-ha, anmani ning anlunghuimak na ium luineimak uh. Anthei anthei ah anchuanpehk na nukjuia asat a aluitho. Pathian chuan kansin na suhnga keini omke kan kan angver anido.
11. Pathian Chongripu le lamkaipu ning anratuk ngâiha asat ah ankanron rang
asuak. Aman tatam kati nimak, natiang salep ha man nâl pe-peht ro, thianghiai rang angâi. Anmani nijak nimak, Pathian Biak inna Pathian chubei bukrang ahong rakip ning kanpuansi kandiar kei ngâihi asat ah thiang hiaiya nâlpe-peht ah kanhong rang asuak ani. Aman tatam ha natiangmak ningko jowtmak tiha nimak. Numei ankhat omke Pasal ankhat ning Pulpit chunga ngihr ranga hova dress ngâiha mo katiang le asatrang tiko naluijet rangke.
12. Lungsiat tak ah Pulpit ah worship lam nakai phahan, numeitiang jak enbak ah chong jehkmaro, hale Pasal tiangjak enbak am chong jehkmaro. Hale chungtiangle thuaitiangle anile asihr tiangjak han enjehl bak ah chong jehk maro. Tâk-ha, nuisiam pârsiamma mirakip ha en inlang harvenga chongha jhekroh. Najehk salep ha manthiang hiairo, mirakip ning nangha jak na enraseu. Narasa ha anjetver rang asuak.
Ajârko, nangin hava Pathian chubeibukna han mirakip Pathian tianga mathokrong animale manthasiatrong irakip nang nakutchunga a omjui. Hajarra, dâr ankhat annijak aphât aninom hava suhnga han nangin mirakip ha Vânram tiang chenaranga lam nakai ani tiha nangin nakan jetrang asuak.
CALL TO WORSHIP WITH INVOCATION PRAYER
Hiva call to worship hi adiktak ko lamkaipui (leader) ning athorang asuak ani. Hiva hi adang dang program alian lianna han Jubilee tâng anile Centenary Celebration tâng jak han Pathian Chuansin tianga VIP ngâi, Biakrup Behlramselpu ngâi anmantho ani. Ha animak ningko ha ngan leader ning athorang asuak. Hiva call to worship hining Biak inna ahongluht miring rakip jiang antaksa anmit anmâi hale anlung pumpuiha Pathian maisua hong entorna annei ani. Hiva rakip hi chonga risuak ajowt, mi alek ning Pathian chongha asat a telsuakna annei. Leader haning call to worship ha ahong tho karra amaning Baibol akuhng alam ngâiha atelsuak thei:
• Habakkuk 2:20; Genesis 28:16, 17;
Puma ko Ama a inthiang han a om; ramual chunga mirakip ning Amaikuhnga omchian raseu. Chongtak balla Puma ko hiva munhin a om. Hiva munhi ko Pathian a inn ani, hale hiva hi Vanram kot ha ani”.
Nangin adang dang Pathian Chong akuhng alam ngâi ham nadei dei ngâiha telsuak ajowt. Hiva Pathian Chonglam ngâihi nahong telsuak suale, leader ning Invocation Prayer anile Prayer of Invocation lamna aneirang ani. Hiva lamna hi Pathian jianga nangin miring rakip ranga ngehnna na ineiha ani. Hiva hi leader ning athorang asuak. Tâk-ha, Biakrup alianna mitam kalna hanko nalamrang chong ramal rakip ham akan isa ha anpabak ah anlam ani. Pathian ha nahongkanchel puiro tia asat ah kuina annei. Hiva hinna Worship lamkaipu (leader) ning lamna aneimak aninko amaning hava worship atorkhanna Pathian jiang ngehnna buia lam akai le akan angrip jui. Hiva hi asatna alek avât ani. Hajarra, Invocation prayer hi asat ah thorang angâi.
Leader ning call to worship le lamna ha atorsuale, leader ning mirakip ha akhehlla ahong mathok naranga ijamo akuirang, chong ajehk rang tiha athuaija hin enrei:
• Kan Puma kan Pathian hi manpâksuam rehtrei, Pathian manpâkna la hi “Puma nachuan katho” hivahi hymn no 70 han aom. Kanrehnga thui inlang Pathian manpâkna la thosuamrei tinang nakut annihan mitamha keithuiro.
DOXOLOGY
(LET THE BEAUTY OF JESUS BE SEEN IN ME) “Jisu mehlsat ha keijiang kando rase! Alungsiat na lungngakna athiang rakip;
Oh Nang ko Pathian Thavâng
Ka nunchan namanthiang roh
Jisu mehlsat keijiang a ommak kârje”
A-M-E-N
(PRAISE GOD, FROM WHOM ALL BLESSINGS FLOW)
Phual rakip Neipu manpâk rei Akutsin rakip (in) manpâk rei; Chungle nuai rakip (in) manpâkrei Apa, (A)nai Ratha Thiang minga
A-M-E-N